رێكخراوی یەكێتی پیاوان لە ماوەی ساڵێكی ڕەبەقدا نزیكەی پەنجا حاڵەتی خیانەتی هاوسەرگیری تۆماركردووە!

جا هەر چۆنێك بێت وهەر بیانوویەكیان هەبێت بۆ ئەو ژمارە زۆر كەمە...!! 

بەڵام بێ موبالغەكردن دەڵێم: كەم هەفتە هەیە دوو پیاو سكاڵای خیانەتی ژنەكانیان نەكەن لەلام!! بەڵكو جاری وا هەیە: سیان! سووكەكەیان ئەوەیە هاوسەرەكەی وێنەی خۆی بە ڕووتی بۆ كوڕ ناردووە. خراپەكەشیان بۆ گێڕانەوە ناشێت!

ئەو ڕاستیە ناشارمەوە كە ئەوسا زیاتر ژنان دەیانوت: خیانەتیان لێكراوە! بەڵام بە ڕاستی ئێستا زیاتر پیاوان ئەڵێن: خیانەتیان لێكراوە -هەڵبەت بە گوێرەی ئەو حاڵەتانەی ڕووی لێكردوین-. واتە: خیانەتی هەردوولا ئێستا زیاتر بووە.

خیانەتیش هەر خیانەت و پیسی و ناپاكیە، ئەبێت لاببرێت، نەك خیانەتی پیاوان وەك خۆی بهێڵرێتەوە و خیانەتی ژنانیش بهێنرێتەوە پاڵی!

جا دەمەوێت ئەو پەیامە بگەیەنم كە ئەو جۆرە كرانەوەیە بە ڕووی ڕۆژئاوادا لە وڵاتی مندا بانگەشەی بۆ دەكرێت فەشەلی هێناوە و شیرازەی خێزان وخانەوادەكانی شێواندووە و تێكداوە! 

ئیتر كەی دلسۆزانی دین و ژین و خاك و ئاومان بە هۆش دێنەوە و ڕێگری دەكەن لەو پشێویە ئەخلاقی و فەوزا كۆمەڵایەتیەی ڕووی لێكردوون بەڵكو یەخەی پێگرتوون!؟

بكرێنەوە، بۆ ناكرێنەوە؟! بەڵام لە سنووری خۆی و مەعقوڵدا!! خۆتان لە یاد مەكەن!! تەماشا بكەن، بزانن لەو هەموو جوانیەی ڕۆژئاوا سەدا بیستیان هێناوەتەوە وڵاتانی ئیسلامەوە. بەڵكو لە هەمان كاتدا سەرنج بدە بزان، لە خراپیەكاندا پێشبڕكێی ڕۆژئاوا ناكەن؟! ئاخر بۆ؟! لە قازانجی كێ؟!

ئافرەتانێكیان درووستكردووە، نە عەقڵەكە هی خۆیەتی، كە بیری پێدەكاتەوە! هی ڕۆژئاوایە! نە ئەو لاشەیەش هی خۆیەتی، كە بازرگانی پێوە دەكات و پارەی حەرامی پێ كۆ دەكاتەوە! هەمووی لە حەیصناعی بۆى بەستراوە!

كێ پشتگیر وهۆكاری ئەمەیە:

- بەشێك لە كەسایەتیە دەستڕۆیشتووەكانی نێو حیزب و دەسەڵات. هەیانە لەسەر ئاستی شەخصی ئیشی لەسەر دەكات و هەشیانە لەسەر ئاستی سیستەم و مەنهەجێكی وورد و بەكرێگیراوی لەبەردەستە بۆ ئەو مەبەستە. هەندێكیان لە شوێنی نهێنی وتوویەتی: "كارێكمان كردووە لە گۆڕینی كۆمەڵگادا، ئەگەر ئێمە نەبوایەین بە بیست ساڵی تر ئەبوایە ڕوویبدایە بە شێوەی نۆرماڵ".

- بەشێكی كەناڵەكانی ڕاگەیاندن، كە هەرچی گەنەڵخەی نێو گەنەڵخەخانەكانی كۆمەڵگا هەیە، هێناویانە بە شەرتی بێ عەیبی ودەرەجە یەكی دەیفرۆشنەوە. لە كاتێكدا وەكو لاكی عەیبداری تۆپیوو وان، بە ساغی پارە ناكەن چ جای بە مردارەوەبوویی؟! 

- بەشێكی منداڵە هەتیووە دایك و باوكدارەكانن، ئەو دایك وباوكانەی تەنها خەمی ئەوەیانه خواردن بۆ منداڵەكەی دابین بكات. نانی پێدەدات تا تەمەنی دەگاتە شانزە یان بیست ساڵی، ئەوسا بە شووی دەدات و فێری هیچ پەروەردە و بەهایەكی جوانی نەكردووە، دەبینی هێشتا لە "مانگی هەنگوێنی"دايە لەگەڵ مێردەكەی، خیانەتی لێدەكات (نموونەی ڕاستەقینە). 

هەیانە تا نیووە شەو لەسەر فەیسبووك و ئینتەرنێتە، ئاگای لە منداڵەكانی و لە هاوسەرەكەی (ژن یان پیاو) نییە و مافیان نادات، هەشیانە ئەو قسە نەرمانەی بۆ مەعشوقەكەی دەیكات لە تەلەفۆن ونامەدا، بۆ هاوسەركەی بیكات، بە دونیای ناگۆڕیتەوە!

- بەكارهێنانی بێ قەید و بەندی تۆڕە كۆمەڵاتیەكان لەلایەن گەنج وتازە پێگەیشتووانەوە! و ئیهمالی دایك و باوك لەم بارەوە وەك ئاماژەی پێكرا.

- بەشێكی (بەناو) ڕۆژنامەنووس وهاوشێوەكانیان، كە گرنگ ئەوەیە لەسەر ئەو ڕاپۆرتە چەندی پێدەدرێت، بێ ئەوەی بیر بكاتەوە لەسەر ئەو ڕاپۆرتە چەندی كۆمەڵگا دەڕوخێت و داواجار درووست نابێتەوە بە ئاسانی.

- هۆكارێكی تر لە زاڵبوونی خراپەكاران: تۆی! بەڵێ، تۆی كە لایكی پەیجی دۆڕاو وداڕماوەكان دەكەیت. كە كۆمێنتی بۆ دەنووسی، تەماشای ڤیدیۆكەیان دەكەیت. پێیان سەرسامی!

هۆكارەكان زۆرن بە خێرایی تەنها ئاماژە بۆ ئەوەندە كرا .

خەڵكی باشمان زۆرە، بەڵام ئەوسا خراپەكارەكانمان كەمتربوون تا ڕادەیەك! بەڵام ئێستا چاكەكانمان زۆریش بن، خراپەكارەكانيشمان زۆرن، بەڵكو زۆرتریشن -علی الأظهر-.

سا داوا لە دڵسۆزان و خەمۆرانی دین و ژین؛ و بەها بەرزەكان و ڕەوشتە باڵاكان و كلتووری كوردەواری و شیرازەی خێزان و جوانیەكانی كۆمەلگاكەمان دەكەم، لە هەر ئاست و پۆستێكن لە حیزب و دەسەڵات و جگە لەوەش، درك بە مەترسی قۆناغەكە بكەن،  و هەنگاوی پێویست بنێن، پێش ئەوەی پەشیمانی سوودی نەبێت و دادی كەس نەدات.

28 جمادی الأولى 1442

10/02/2021

ئەم مەقالەیە لە فەیسبووك